أصعب أربع دقائق عاشها الشعب المصري في تاريخ نضاله الحديث

أول حاجة فكرت فيها لما سمعت المعلق على ماتش النهائي، إللي أنا روحت أتفرج عليه غصب عني، بيقول قبل نهاية الماتش بأريعة دقائق، أن هذه أصعب 4 دقائق يعيشها الشعب المصري، فكرت وقلت هو الشعب المصري لسة فيه روح علشان يعيش بصعوبة؟ وإيه أربعة دقائق بس؟ الناس دي والله ما عندها دم، والله نستاهل أكتر بكتير من اللي بيجرارنا. خلاص تاريخنا كله اختصرنا في أربعة دقائق مع حداشر لاعب في استاد كرة قدم. مع احترامي للاعبين وانهم أدوا ما عليهم، ولكن هل أصبح هؤلاء اللاعبين كل ما لدى مصر لتفخر به؟

خلينا كدة نايمين في العسل والكورة والبطولات المزيفة. الناس بطلع في الروح في البلد ومع كدة بيجلها زهايمر أول ما تشوف كورة مدورة على نجيلة خضرا. امبارح كنت حطلع في الروح وانا بحاول أقنع واحد مثقف متعلم رب أسرة أن بطولات المنتخب والأهلي والزمالك من أهم دعائم الحكم في مصر وأستقرار الأوضاع فيها لأن النظام بيستخدمها علشان ينيم بيها الشعب. ويقولي انت يعني مش عايز الناس تفرح في وقت هم في أشد الحاجة إلى أخبار مفرحة. أنا بغني وهو بيرد عليا ما شاء الله. أنا بقوله النظام بيعمل للمصريين تنويم مغناطيسي بالكورة والمسلسلات وهو يرد عليا بان الناس محتاجة تفرح علشان حياتهم بقت فصول مستمرة من المعاناة والكآبة يعني عايز الناس تعمل إيه؟ تفرقع؟.

أيوة لازم الناس تفرقع. كل الهبل دة علشان الناس ماتفرقعش في وش شوية الحرامية والنصابيين إللي ماسكين البلد. الهيافة دي عاملة زي رفع معنويات واحد مريض بالسرطان وبيموت. الناس إللي حواليه عارفة انه بيموت فبتهَون عليه. يا شعب يا وسخ يا عبيط يا أهبل انت شفت الحكومة امتى رفعت أسعار 3 سلع مهمة 3 مرات؟ أيوة يا دهل منك ليه… رفعت الأسعار 3 مرات وقت كأس الأمم بنفس نظرية لا صوت يعلوا فوق صوت “المبخرة”. شموا البخور واتسطلوا…. بس على فكرة وزي ما قال المعلق المعجزة “كترة الدق تفك اللحام”. امتى اللحام يفك؟ ويحيا البيروسول