الدكتورة سحر وكان وأخواتها

egy_disc.JPG

كانت الدكتورة سحر علام في الماضي -حتى سنة 2002 ربما- من أبناء المعهد القومي للبحوث الفلكية التابع لوزارة البحث العلمي. سافرت إلى ألمانيا وحصلت على درجتي الماجستير والدكتوراه. لها أبحاث وأوراق عمل منشورة في دوريات علمية شهيرة. وبصورة ما هي الآن تعمل مع مجموعة من علماء الفضاء في حاجات أنا بجد أغبى من أني أفهمها. المهم الست المصرية العظيمة دي عملت حاجة جامدة وفرقعت في الأوسان العلمية والمعملية في معامل أبحاث الفضاء الأمريكية. اكتشفت قوس مضيء من المجرات أو النجوم. المهم الاكتشاف دة مذهل وخطير وزي الفل وألسطة يعني الست ما قصرتش ورفعت راس وطولت رقبة كل واحد فينا مع اننا بهايم ما نستاهلش

مين لقط الخيط؟ الدكتور صلاح محمود رئيس المعهد القومي للبحوث الفلكية كان قاعد بيشرب قهوة الصباح وبينعكش على الإنترنت وبيشوف الناس إللي برة دول وصلوا لفين واحنا هنا في الخرابة دي محلك سر. مرة واحد لقا اسم دكتورة سحر ملعلط في في آخر أخبار الاكتشافات الفضائية . الراجل فرح موت لما بنت من بناته تكون هي قائدة فريق العلماء المسئول عن الحدث دو وهي إللي اكتشفته بنفسها. قام رافع سماعة التليفون القرص إللي على مكتبه وكلم جرنال الأخبار

طبعًا جرنال الأخبار عارف اننا عالم هبل وعقلنا على قدة فقام ناشر الخبر بطريقة أفعل التفضيل. يعني لو دي أبعد مجرة، يبقى مفيش أبعد منها. ولو دة أكبر ميناء بالشرق الأوسط يبقى مفيش ميناء أكبر منه، ولو دة أضخم مشروع يبقى مفيش مشروع أضخم منه. وكله علشان الغلابة إللى بقى حال البلد لا يسر عدو ولا حبيب. ومع احترامي الشديد وتقديري العميق للعالمة المصرية الدكتورة الرائعة المجتهدة سحر علام، إلا أن الخبر دة ما لقيتوش غير في الأخبار العلمية. ولكن لأننا أمه فقدت بريقها واختفي لمعانها تحت صدأ الفساد والتعليم باظ والفاكهة باظت والجامعات باظت نشرت الأخبار دة في الصفحة الأولى على طريقة القرعة بتتفشخر بشعر بنت اختها، دة لو طبعًا كانت أمريكا بنت أختها صحيح

موقع الجمعية الفلكية الأمريكية

موقع المعهد القومي للبحوث الفلكية: ولا سيرة عن دكتورة سحر علام، هي مش من أبناؤكم ولا إيه يا دكتور صلاح؟

السيرة الذاتية للدكتورة سحر: بص في آخرها في جزء المراجع الشخصية، ولا مرجع مصري واحد، ولا حتى انت يا دكتور صلاح

رد واحد

  1. اسمحلى بقى انشر الموضوع دا على النت عشان كدا عيب اوى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: