في مصر المحروسة وما حولها

cairo_street_02.jpgقلت وماله نروح مصر نقضي العيد ونستقبل السنة الجديدة هناك .. أنا عندي أسبوع كامل أجازة من الشغل ووجع الدماغ. أهو نشوف الأهل وندبح الخرفان ونعرف الناس في مصر عاملة إيه. الغريبة ان كل مرة مرة أروح فيها مصر مابلحقش أكلم حد أو أمشي في البلد براحتي. كل الأجازة عبارة عن رحلات مكوكية بين بيت أهلي في الهرم وبيت أهلها في مصر الجديدة. نصيحة لو انت عايش برة مصر ونازل أجازة حتأجر فيها عربية خلي عينك على عداد الكيلومتر ولو السيد الوالد عنده عربية وخارجين سوا يبقى المشوار بعربيته. الكيلومتر الزيادة بخمسين قرش وحتلاقيك في آخر الاجازة عاملك مبلغ محترم. طبعًا انتوا عارفين السواقة في مصر عاملة ازاي. المشكلة إللي ماطلعش برة مصر ما يعرفش غير الطريقة إللي بيسوق بيها. لو كنت مش بتسوق غير في مصر وما شفتش حتة غيرها (دة مش ذبنك على فكرة) تعالى أقولك حاجات حتستغربلها:ـ

النقل بيمشي على اليمين مش الشمال. لو داخل على ميدان تبقى أولوية المرور لمن هو في داخل الميدان. والله انا اتعذبت في ميدان الرماية. المفروض تقف وتبص يمين وشمال قبل ما تدخل على طريق رئيسي. بلاش تقف .. هدي الله يخليك انا مش هوا انا ماشي قبلك والمفروض تعمل انت حسابي. لو حتعدي مزلقان سكة حديد وفيه قطار جاي في السكة والدنيا ليل مالوش لزمة أبدًا تقلب نور للقطار وتعدي قبله. لو قدامك ميدان وعايز تلف وترجع، يبقى تلف وترجع بعد ما تلف الميدان، ما ينفعش تسرقه  من على الشمال. لو انت مجنون وبتسوق بسرعة يبقى ياريت تتخطى العربيات اللي قدامك من على الشمال مش من على اليمين.

adhya.JPGالدبــح

القاهرة بتبقى حلوة وفاضية في الفجر، بس والدنيا بالبرودة دي لازم تفكر ميت مرة قبل ما تصحى الساعة 5 صباحًا وتسيب دفيء السرير وتسوق من مصر الجديدة لباب الشعرية علشان تحضر طقس شعائري بشري دموي قديم يفكرك قد إيه ان الانسان ممكن مايفرقش معاه ان شكل من شكل الحياة مثله تفقد الحياه على إيديه. عمرك تخيلت نفسك خروف؟ انا عارف طبعًا ان فيه ناس كتيرة بيتقال عليها خروف، بس أنا قصدي انك تتخيل نفسك خروف بجد ليه فروة وصوف وقرون كمان. تخيل نفسك مزنوق فوق السطوح مع مجموعة تانية من الخرفان وفي نفس المكان إللي انتو بتعملوا فيه كاكا وبتاكلوا من على الأرض إلي برضه مليانة كاكا، مش مهم انت أصلاً خروف ومش عارف ان الكاكا دي وساخة ومش كويسة علشان صحتك. وبعدين يعني انت مش حتعرف أكتر من الناس الطيبين إللى مربينك وبيعطفوا عليك كل شوية بربطة برسيم أو عيش ناشف. بس أكيد حتعرف اد إيه هما طيبين معاك لما واحد شكله وحش قوي عمرك ماشفته قبل كدة يجرك من قرونك ويطرحك أرضًا في حركة من حركات المصارعة الحرة ويشد قرونك لورا لغاية ما رقبتك تعمل منحنى أو نصف دايرة كاملة ووفي نفس الوقت فيه واحد تاني ماسك رجليك وبيضغط على رجليك التانيين بركبه وفي الوقت دة لازم تتشاهد علشان سكينة مسنونة بتمر دلوقتي على رقبتك وتقطع جلدك وتعدي على أوردتك وشرايينك ويبتدي الدم في التدفق بغزارة. لغاية دلوقتي ممكن سعادتك مانكونش حاسس إلا بحرارة تحت دقنك، المشكلة بتبدأ لما السكينة تتوغل شويتين وتبدأ تجز في قصبتك الهوائية. حيبتدي التنفس يبقى صعب شوية بالذات لما يبتدي الدم يدخل مع الهوا وتحاول تكح تلاقي نفسك مش عارف. في اللحظة دي تحاول تبص حواليك، وضعك على الأرض مش حيساعدك كتير بالذات لما الرجل اللي شكله وحش أبو سكينة يسيب راسك من إيده ويضغط عليها برجله. بس عمومًا انت ممكن تشوف شوية أطفال حواليك فرحانين قوي لدرجة انهم تحمسوا جدًا وبدأوا يضربوك بالشلاليت زي ما تكون ناقص. دلوقتي يا خروف باشا بتحس ان الدنيا بقت غريبة وبتبتدي تضلم، تحاول تتمسك بالحياة بأي شكل وجسمك يبتدي ينتفض انتفاضات غير منتظمة تعبيرًا عن كمية الدم الرهيبة إللي انت فقدتها. دلوقتي يا خفيف بتحاول تعمل أي حاجة ومش عارف ومش شايف أي حاجة. بتحاول تاخد نفس أخير بيطلع النفس من قصبتك الهوائية من مكان الدبح بصوت مبحوح وبحشرجة أخيرة يائسة تعلن فيها استسلامك التام ويسكن جسدك سكونه الأخير. دلوقتي انت مت يا خفيف وروحك بتطلع لفوق دلوقتيز وانت طالع بتبص على نفسك ومش مصدق ان انت كنت عايش في الدنيا دي علشان الناس تعملك كباب وهبر في أيام العيد. وانت طالع تتفاجئ ان دبحك كان مجرد بداية. ينقض على جثتك اثنين من الشباب اليافع متورد الوجنتين يأخذ أحدهم برأسك فيفصلها عن باقي جسدك ويقوم الآخر بفصل قدمك عند الكاحلين ويغرز المسن بين الجلد والعظم ليكون فتحة يقوم عندها بالبدء بالنفخ. أنت الآن بينفخوك يا خفيف. تتعجب عن قدرة رئة هذا الشاب النحيل على الدفع بالهواء بقوة ليفصل بين جلدك وباقي جسدك. وعندما تنتفخ أوصالك وتعلوا بالهواء بطنك يعوى عليها الشاب الآخر بعصا وضربها بعض الضربات القوية قبل القيام بشقها، وهنا تبدأ عملية سلخك. عند هذا الحد لا تتحمل مشاهدة المزيد وتسلم نفسك لملائكة الخرفان ممنيًا نفسك بجنة مليئة بالمرعى والكلأ الطيب وليس بها ذئاب أو جزارين. الله يرحمك

كل سنة وانتم طيبين يا أخي في الله

neqab_begging.jpg مازال الوقت مبكرًا وشنطة العربية تئن بحمولتها من أجزاء الخرفان المختلطة بعضها ببعض. أكياس بلاستيك مليئة ببقايا صاحبنا المدبوح فوق. تبدأ شوارع القاهرة بالازدحام ويبتدي سيرك المرور الذي أشفق على أهل القاهرة منه. فجأة تعبر الطريق سيدة ممتلئة تلبس نقابًا وتضطرني لأضغط بقوة على فرامل العربية، أقول معلش أصل صعب انها تشوف كويس بالنقاب، بس تعاطفي معاها بيروح لما تلفلي الناحية التانية وتقرب من الشباك وتقوللي كل سنة وانتم طيبين يا أخي في الله. الست المنقبة طلعت عايزة حاجة. وعلشان أنا مش عايش في مصر المحروسة اتفاجئت جدًا، بس أنا متأكد انكم بتشوفوا المنظر دة كتير. لبسها زي لبس الخليجيات بالظبط بس عيونها مش متكحلة زيهم. ماخدوش منهم غير اللبس البشع المخيف دة. مش حاقدر اخبي امتعاضي من المنقبات وأنا مع كل المنتقدين لهذا اللباس المنفر الغير انساني، مع كل المنتقدين المسلمين منهم والكفرة العلمانيين. دعوني أوضح موقفي من النقاب. أولاً لا اتكلم من منطلق ديني فلا يأتي أحدهم ويسوق لي الأحاديث والآيات القرءانية فهذا الموضوع لا يخلوا من الخلاف

لا أحب النقاب ولا أشجع أحدًا عليه ولا أرضاه لأختي أو زوجتي أو أمي وأراه رمزًا فاسدًا على الصلاح والتقوى والاستقامة. أشعر أن كل منقبة تقول لغير المنقبات (سواء محجبات أو سافرات) تقول لهم أنا محترمة وانتم لا، أنا شريفة وأنتم بدون شرف، أنا أعلى عند الله وانتم أدنى. ومع هذا لن أدعوا إلى منع النقاب فمن تريد لبس النقاب لها حرية الملبس ولكن مع بعض المحددات. كيف لي أن اتعامل مع موظفة عامة تلبس نقابًا ولا أراها ولا أستطيع التعرف عليها. حدثت لي مشكلة مرة وأنا أدفع الكهرباء في بلدية العين بالإمارات عندما نشب خلاف بيني وبين أحد العاملات على الصندوق. وذهبت لأشتكيها إلى رئيسها، وعندما عاد برفتي طلب مني أن أخبره عن الموظفة محل الشكوى، ولأنني لم اتذكر بالضبط رقم الشباك أخبرته انها واحدة من اثنتين إما من تقف على شباك خمسة أو شباك ستة. عندها طلب مني المشرف التحديد فانفجرت غاضبًا وقلت كيف لي أن افرق بينهم، كلهم بدينات ويغطين وجوههم. عندها ثاروا جميعًا ومن لطف الله ان المسؤول كان متفتحًا وقام بحل الموضوع

تخيل نفسك تتعامل مع مجموعة من المقنعين، يعرفونك حق المعرفة ولا تستطيع انت أن تفرق بينهم. ينظرون إليك ويفحصونك من شعر رأسك إلى إخمص قدميك، أما أنت فلا تعرف حتى من فيهم يكلمك. أضطررت مرة أن اتعامل مع مجموعة من المنقبات في محل عملي، في الزيارة الثانية لمكتبهم بادرتني أحداهم بالتحية وقامت بلومي لأني سألتها هي نفسها إنت كانت هي نفسها موجودة بالمكتب لنكمل ما بدأناه سويًا في اليوم السابق

070106_201804.jpgلا يمسه إلا المطهرون

 أكره كل أشكال التعصب، بالذات التعصب الغبي والمسبب للمشاكل. المجتمع المحلي في الإمارات مجتمع متسامح نوعًا ما مع غير المسلمين وبعيد كل البعد عن جاره السعودي في تزمته وشغفه بالتفاصيل وحشوات الدين. بعدما عدت من أجازتي القصيرة إلى القاهرة ذهبت مع بعض الأصدقاء إلى أحد الأسواق (المولات) العديدة في الإمارات، ورأيت على الرف بعض المصاحف ومعلق عليها لافتة تقول انه ممنوع اللمس لغير المسلمين. شيء عجيب حقًا، هل ستمنع هذه اللافتة لمس المصحف من قبل غير المسلمين، ألا تعتبر هذه اللافتة غباءًا واضحًا ودعوة صريحة إلى الأغبياء من الطرف الآخر إلى رمي المصحف في الحمام وشد عليه السيفون. تخيل لافتة مماثلة تخبرك بعدم لمس التلمود وانت تؤمن أن التلمود هذا مجرد خرافات. ثم ماذا إذا أراد مايكل شراء نسخة من القرءان؟ كيف لغير المسلمين إذن قراءة القرءان والاحساس بمعجزته لعلهم يهتدون؟

Advertisements

6 تعليقات

  1. كلامك صحيح اخي العزيز فبعض التصرفات التي نقوم بها نحن المسلمين تنفر الطرف الثاني من تقبل الدين الاسلامي كدين رحمه وسماحه، ولعل بعض القائمين على الدعوه يغيرون في اسلوبهم شوي بدال اسلوب التخويف هذا

  2. انا عايزه اعرف اشمعنى الخرفان بالذات اللى لنت متعاطف معاها هو انت مش بتاكل فراخ وبط و لحم بقر وغيره اشمعنى دول مش بتتعاطف معاهم ولا ده عشان دى عاده بنعملها فى العيد الاسلامى بتهاجمها؟ ثانيا بالنسبه للنقاب انا مش منقبه و لا اشجع النقاب لكنمش بهاجمه زيك وانت اخر واحد متاكده انه ممكن يسمح لامه او مراته او او اخته بالنقاب لانى متاكده انك اساسا مش بتصلى ؟ الحاجه الاخيره انى متفقه معاك ان الصوره دى بتنقل فكر غلط عند غير المسلمين عن الاسلام

  3. إللي عايز يدبح خرفان يدبح… واللي عايز ياكلهم ياكلهم لخرفان دي مش من العيلة انشالله كلهم يموتوا. بس أنا خايف يجي يوم الخرفان تمسك حكم مصر وتدبحنا كلنا. وبعدين انا مش باكل لحمة، أي لحمة. انا نباتي باكل خس وكرات ورجلة. وعلى ذكر الرجلة لو عارفها، هي نبات ورقي ينبت في أرض مصر بدون تدخل من الفلاح ويشترك البشر والحمير في أكله، وكنت أرى فلاحًا يأكل من مقطف مليء بالرجله هو وحماره في نفس الوقت. وكانت تطهو جدتي ألله يرحمها لنا الرجلة ونحن صغار في غياب أمي، لأن الأخيرة لا تعترف به كطعام للبشر وكانت تتشاجر مع جدتي كلما علمت أننا قد أكلنا رجلة أو كرات ذو الرائحة المنفرة. وطعم الرجلة لا يشبه أي من الخضروات الورقية الأخرى المعروفة مثل الملوخية. ولا يمكن أن أتذكر الآن طعمه بعد مرور كل هذه السنوات فاعذريني. وجل ما أتذكره عن هذا النبات أن ورقته كان غليظة وكان ينتج الكثير من العصير عند مضغه نيئًا. واللهم طولك يا روح، وياروح مابعدك روح.

  4. اهدى شويه و هدى اعصابك خليك فريش احنا ف رحله

  5. شيء جميل انك لا تستطيع ان تميز بين منقبه بدينه ومنقبه بدينه اخرى ! للنقاب اسرار وخفايا تخفى عليك وعلى غيرك من نفس النهج والفكر ! تخيل انك تستطيع تمييز اشكال وابدان والالوان واجساد جيرانك كلهم وحده وحده! حتى في بعض الاحيان وفي هذا الزمان بالذات تستطيع انك تعرف لون لباس جارتكم او بنتها! احمر اخضر اصفر! لانو اللباس يكون باين من البنطلون احيانا! وتخيل يكون في شخص مريض ومش محترم في نفس العماره او بالحاره ! وهو يعرف تفصيل كل نساء العماره او الحاره! بيضه سمره سودا! ويبدأ يتكلم عن دي ودي وانا كنت معاها ودي بنت…… وبنت …….. والكلام ده يعني طبعا لانه يعرف شكلها كويس يأدر يعمل الهوايل. يا اخي النقاب ستر , صحيح انو هو مش مفروض, ولكن ايه المشكله تتنقب ولا ما تتنقبش! وليه بتحس ان المنقبه بنقابها بتحاول تؤل انو هي شريفه والباقي لا ؟ وهي محترمه والبائي لا ! لا مش صحيح! المنقبه او المتحجبه حجاب شرعي متكامل بتحاول تؤل “انا مؤمنه تمام الايمان” وهي كذلك انشاءالله. هدانا وهداكم الله. بالنسبه للقرأن: ليش اسمح لاجنبي يلمس القرأن ؟؟ علشان ايه ؟؟ يحتفض به للذكرى ؟؟او للزينه ؟؟ يشتري واحد مترجم اذا حابب يفهم!

  6. عندك حق .. المنقبة أو المحجبة حجاب شرعي كل منهن تقول “أنا مؤمنة تمام الإيمان” “أما أنتم فإيمانكم ناقص”

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: