حتى يليق بسمعة مصر

معرض القاهرة الدولي للكتاب أختتم آخر دوراته من أيام قليلة. آخر مرة ذهبت فيها  إلى معرض الكتاب كنت بصحبة زوجتي وكنا كالتائهين وسط الزحام وبائعي البالونات ومطاعم البرجر والفول والحلبسة. كان المكان يعج بالبشر حاملي الأكياس البلاستيك المليئة بالكتب وكأن كل سكان القاهرة هناك. وعلى الرغم من وجود اللوحات الارشادية كان هناك بعض الصعوبة على التعرف على وجهتك أو الوصول إليها بسهولة

المكان ضخم وكمية العناوين المعروضة وهمية وعدد الناشرين كبير جدًا. معرض القاهرة الدولي للكتاب حدث معرض جامد ومثير وغني في الوقت نفسه. فطن المنظمون أن المعرض بهذه الصورة لا يرقى إلى مستوى الحدث. فهو مليء بالفوضى وطريقة عرض الكتب تعطيك الانطباع أنك في سويقة كتب ولست في حفل ثقافي على مستوى عالي. المهم يا سادة سمعت مؤخرًا في أحد القنوات المصرية التليفزيونية الفضائية (هو أصلاً مش سر ولا حاجة .. القناة اسمها أوه تي في)أن هناك تفكير جدي في نقل المعرض في دورته القادمة إلى مركز القاهرة للمؤتمرات حتى يليق بسمعة مصر. (طان طان … طان .. موسيقى تصويرية) … سمعة مصر، حتى يليق بسمعة مصر، قشطة

طيب .. نفكر كدة مع بعتشينا (بعضينا) ونحاول نتعرف على سمعة مصر. يعني إللي يسمع الكلام دة يفتكر ان البلد (مصر يعني) بلد متقدم ونظمت مهرجانات وأحداث على مستوى دولي مشهود لها بالنجاح. طيب كدة حاول بس تفتكر أي حدث دولي نظم في مصر إلا وحتلاقيك فاكر كل البلاوي إللي حصلت على هامش التنظيم من أول مهرجان القاهرة والاسكندرية السينيمائي لغاية مؤتمر الصحة والسكان. ولا نكون فاكرين ان احنا ماخدناش صفر في تنظيم كاس العالم. وزي ما يكون إللي رفضوا يصوتوا لمصر في تنظيم كاس العالم قالوا (لأ إلا مصر والنبي وإلا كاس العالم حيبقى سمعته في الحضيض) عمومًا الحمد لله ان كاس العالم نفد من التنظيم في مصر وإلا كان العالم كله مش حينساهلنا

يعني لما نتكلم عن سمعة مصر لازم يبقى فيه رصيد نتسند عليه، رصيد من النجاحات مش الإخفاقات. كان الأحرى أن نقول، سوف يتم نقل الحدث (معرض الكتاب) إلى مركز القاهرة الدولي للمؤتمرات حتى نحسن من سمعة مصر ويكون هناك نظام واضح للتحسين لا يشبه بأي حال من الأحول نظام الثانوية العامة إللي كفَر العيال

Advertisements

رد واحد

  1. طبعا متفق معاك . متهيألى ان الحاجة الوحيدة اللى مصر نظمتها كويس : كاس العالم بتاع الشباب 1997 ، ساعتها كنت لسة فى ثانوية عامة وكنت مبهور بالكاميرات اللى بتصور من كل زاوية تعرفها او متعرفهاش ، وتوقعت بقى انى هشوف ماتشات الدورى كلها بالشكل دا ، وطبعا خدت مقلب .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: