المولـّة والمقبض والترباس

لما كنت في المنصورة أيام تجارة انتساب، قررنا أنا وبعض الأصدقاء تأجير شقة هناك حتى نستقر ونعرف نذاكر، بغض النظر عن كل الموبقات اللي عملناها قدرت بعد كدة إني أحول من تجارة المنصورة. المهم اننا لما روحنا نأجر الشقة وقابلنا الست صاحبة البيت وفرجتنا عليه وكان حالته زبالة. البياض واقع والأبواب مخلعة والبلاط ساقط وشيء خرة على الآخر. الشقة كانت مفروشة بشوية كراكيب قديمة. الست المجنونة كانت بتعايرنا انها حتدي لكل واحد منا السرير بمولته. واللي ما يعرفش إيه هيا مولـّة السرير فهي تلك الألواح الخشبية الموضوعة تحت المرتبة بعرض السرير، وبدونها يصبح السرير مجرد اطار خشبي لا يوجد به شيء يحمل المرتبة فتقع على الأرض وسط السرير. المهم الست المخرفة بتقولنا انها حتدينا السرير بالمولـّة. إزاي أصلاً يبقى سرير من غير مولـّة.

دة كان من حوالي خمستاشر سنة وساعتها مفهمتش كان قصدها إيه الست المخرفة دي. وبعدين كنا فرحانين قوي ان ساكن فوقينا رقاصة بفرقتها ومخدتش بالي من إللي قالته كويس لأنها كانت بتتكلم من على السلم ومن وراها كانت واقفة نجلاء من فرقة الست، ومع انها ماكنتش معبراني إلا اني كان أول مرة أشوف فيها رقاصة عندها سبعتاشر سنة ولابسة….. إيه دة … أنا بقول إيه .. المهم نرجع تاني لموللة السرير. إزاي تعاير حد أو حتى تقوله “خلي بالكم .. أنا مدياكم السراير بموللها”.ـ

k_ware.jpg

المهم بعد كدة بكام سنة اتخرجت واشتغلت في مصر سنتين وسافرت وجيت هنا الامارات وبانزل مصر كام مرة كل سنة. وفي مرة كنت في البستان مول في وسط البلد. واللي ميعرفش البستان مول فهو في أول باب اللوق على ناصية كدة في شارع التحرير ومليان محلات ملابس رجالي بس. المهم روحت الحمام وأول ما دخلت لقيت الراجل إللي “بياخد باله من الحمام” بيقوللي: “على فكرة يا بيه .. فيه كلينكس في الحمام” وابتسامة عريضة مرسومة على وشه. طيب إيه يعني المميز إن فيه كلينكس في الحمام؟ أنا بقة بقالي كام سنة برة ومتدلع ومعرفش ان الحمامات العمومية في مصر مش طبيعي يبقى فيها شطافة مش كلينكس. ومرة مراتي بتحكيلي عن موقف مشابه في مطار الاسكندرية لما الست بتاعة الحمام قالتلها .. “على فكرة .. الباب فيه ترباس من جوه”… يا ألطاف الله … ترباس؟؟؟ ومن جوه ؟؟؟ ليه التبذير دة .. ليه مش حتة دوبارة وخلاص ..ـ

ومن شوية طلع اعلان على قناة دريم بتاعة أحمد بهجت بتاع تليفزيون جولدي الفظيع المريع أبو شاشة مسطحة، الاعلان من فصيلة اعلانات عسل السدر الجبلي إللي بيجي معاه هدية برطمان عسل بردقوش هدية (معرفش يعني إيه بردقوش)… بس الاعلان المرة دي كان عن طقم حلل صفيح استانلس معجزة. صوت المعلنة كان بيعدد في مزايا طقم الحلل وازاي ان مقاستهم مناسبة وألوانهم عبقرية وعمقهم ثوري ونقشهم فنان وبعدين جات المفاجئة العجيبة…. الشركة المصنعة كمان زودت غطيان الحلل بمقابض لسهولة الفتح والتقليب…(طان .. طران .. طان .. موسيقى تصويرية) مش ممكن محدش فكر فيها قبل كدة الفكرة الفظيعة العبقرية دي. ياربي. واحنا الجهلة المساكين كل السنين دي ومفيش حد فكر يضيف مقبض لغطا الحلة! اختراع هايل يستحق جازة نوبل للفيزياء وقلادة النيل والسعفة الذهبية وكمان من الممكن اختراع زي دة يهدي نفوس عمال الغزل والنسيج المضربين

عمومًا يا جماعة لازم نفهم من العرض السابق أن الموضوع مرتبط بالبديهيات. المصريين بقى عندهم نقص في البديهيات. والشيء البديهي أصبح كمالية، يعني في أي حمام في أي مول المفروض انك تتوقع يكون فيه كلينكس في الحمام. لأ عند المصريين الكلينكس في الحمام مش بديهي. دة شيئ من الكماليات يستدعي أن يبتسم لك عامل التواليت بكل سعادة ليعلن عن توافر هذه الكمالية والرفاهية في حمامه. ولو انت داخل أي مكان خاص يفترض ان الباب فيه شيء يخلييه يقفل من جوة. لأ غلط .. دة مش بديهي عند المصريين. لو ان باب الحمام فيه ترباس من جوة أو ممكت تقفله على نفسك من جوة دة يبقى كماليات .. رفاهية يعني… أما بقى لو إن كل الحلل إللي في الدنيا فيها مقبض في الغطا، فده مش مبرر إطلاقًا إن دة لا يعتبر كمالية هو الآخر ورفاهية تستدعي أن تعلن على جميع خلق الله في التليفزيون ويعايروك بيها … آل إيه والشركة المنتجة زودت الغطا بمقبض لسهولة الفتح والتقليب. وحياة أمك؟ هو فيه غطا حلة يا ولاد الجاهلة من غير مقبض؟ أرحمونا

ما ننساش برضه يا جماعة ان وقت من الأوقات ان لما تشتري عربية من برة وتنزلها مصر بتدفع رسوم على الكماليات التالية: المرآة الجانبية على الجهة اليمنى (زي ما يكون مفيش حد حيمشي على يمينك أو ان كل المصريين عور في عينهم اليمين) ـ مساند الرأس – الباور ستيرينج – أحزمة الأمان (يا نهار منيل) – مصابيح الشبورة – الراديو كاسيت- لمبة الأستوب في الوسط –

وأخيرًا أحبائي أود أختم هذه التدوينة بقول الصديق الحبيب والرفيق العزيز الوحش المقدام أبو أسد الأسود (في الواقع ….. البحر مليان قواقع)ـ

Advertisements

8 تعليقات

  1. fe el7a2e2a we elwake3… elba7r malyaan kawake3.

    howa da ta3le2i ana sadekokak elsadok we elrafeek el3azeez elwa7sh elmekdam abo asad el2osood.

    we saba7o mehallabeya

  2. ahh sa7ee7,, 7’alli balak en elmahallabeya de feha laban we vanelya.

  3. حقيقى كل ماذكرته أصبح الآن بديهيات خارج مصر , وكل ماذكرته فعلا يحدث فى مصر , وتخيل عندما يرى الأجنبى ذلك بعينه , عموما أشكرك على عمل وصلة لمدونتى عندك

  4. أنا زيك أذهل تماما من توكيدات الناس في المعاملات على أشياء بديهية أو حتى أن غيابها يبطل الموضوع من أوله!

    لكن ملة السرير تحديدا يمكن يكون لها وضع آخر. بما أن صاحبة البيت كانت بتوكد عليكم أنها “سلمتكم” السراير بالملة، فدا معناه أنا متوقة “تستلمها” بملة سليمة، و دا قد يتعذر ضمانه في حالة ممارسة أنشطة تصادمية عنيفة على سطح السرير، و هو يكون متوقعا من شباب في سن حضراتكم وقتها…أخذت بالك؟

    خللي بالك: التعليق دا مكتوب بالحروف جنب بعضيها.

  5. no comment

  6. أنا مش عارف انت مش عجبك الوضع ولا المكان
    لأن كل اللي بتقول عليه بيحصل في مناطق تانيه
    اي نعم دي أول مره اقرألك والاسلوب فعلا ممتاز بس اللي معجبنيش وأسمحلي أقول معجبنيش أنك بتنتقد بلدك

  7. أستاذ محمد، أنا بعتذر بشدة عن انتقادي لبلدي. أنا معنديش أي حق في الكلام إللي قولته. الدنيا جميلة وحلوة وماما زمانها جاية، وتوت توت قطر زغنطوط .. بالليل بيفوت .. بيهل علينا .. توت توت توت ….

  8. (الفقر فى الوطن غربه،والمال فى الغربه وطن)
    عندما تبيت البطون جائعة،عندما تتوسل لتلحق إبنك بإحدى مدارس الحكومةوتتعهد بدفع الإنشاءات والتبرعات والذى منه..رغم بلوغ إبنك السن القانونى،عندما يجلس شباب مثل الورد دون عمل فى المقاهى يراقبون أحلامهم تتبخر فى الهواء مع دخان الشيشة،عندما يتوفى العائل ويتم صرف معاش للورثه المستحقين بعد عام ونصف من وفاته
    حين يحدث كل هذا،أو بعضه فى بلد ،أى بلد، لابد أن تصبح الأساسيات كماليات والبديهيات إمتيازات..وعجبى..!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: