وفاء سلطان – اسأل الله أن يهديكي أو يأخذكي

وفاء سلطان أصبحت تشكل تهديدًا ما بحيث هبت جميع فئات المسلمين من سباتها العميق للرد عليها. اعلمي يا وفاء يا سلطان انه عندما نرى صورتك على قناة الجزيرة نعلم حينها أن النصر قريب. النصر على ماذا بالتحديد لا أعلم، ولكنه آت. ولذلك لا بد وان نطالب قناة الجزيرة باعادة بث مقطع تهجمها على دين الله مرات عديدة كل يوم حتى يتم استحضار النصر بصورة أسرع. أسأل الله أن يهديكي أو يأخذكي:

وهذا لم يتحمل افتراءاتها وقام بمقارعة الحجة بالحجة وأنقذ الاسلام وفضح مهاجميه:

سيبك بقة من الهبل إللي فوق دة. انا ماكنتش شفت لقاء فيصل والست وفاء الأخير إللي الناس عملوا منه حكاية ورواية. وقلت يا ترى الست العبيطة دي قالت إيه تاني. أيوة تاني لأنها هاجمت الاسلام بطريقة قاسية قبل كدة وعلى شاشة الجزيرة برضه. المهم روحت وشفت الفيديو ودلوقتي انا متأكد ليه الجزيرة بيجيبوا الأشكال دي في محطتهم.

    • أولاً في كام كاره للإسلام في العالم؟ كتير؟ لأ طبعًا مش كتير. دول كتيرقوي.. العالم ما شاء الله فيه جهلة كتير. طيب كام واحد بيتكلم ويشتم في الاسلام؟ كتير جدًا جدًا وبلغات ولهجات زي الرز لأننا والحمد لله بقينا مشهورين في العالم كله. واللي بيهاجم الاسلام بيهاجمه وبيتكلم عليه وبينتقده بطريقة مشابهة للطريقة اللي بيتبعها المسلمين نفسهم لما بينتقدوا المسيحية واليهودية ويقولوا ان كتبهم محرفة. سيبك دلوقتي أنا متنيل على عين أهلي أؤمن بإيه… تخيل اني هوا والكلام دة طالع من الحيطة… المسلمين بيهاجموا اليهودية والمسيحية ولا لأ… ماحدش يقولي والنبي اننا مش بنهاجم موسى وعيسى علشان احنا بنؤمن بيهم… تقديس المسيح في المسيحية مختلف عن تقديس الرسول محمد في الاسلام. لكن ممكن نساوي نظريًا بين درجة تقديس رسول الله محمد في الاسلام ورسل يسوع في المسيحية. كام مرة لقيت في كتب اسلامية بتهاجم بولس الرسول وهو تقريبًا أهم رسل المسيحية؟ دور كدة على الانترنت وانت تلاقي المنتديات والكتب الاسلامية في معرض القاهرة والرياض الدوليين مليانة هجوم على بولس وانه هو مؤسس ومحرف المسيحية المعاصرة. يعني كل واحد بيهاجم التاني. قوم بقى سعادتك دلوقتي وسن القلم الفحم بتاعك وارسم بولس الرسول على شكل خنزير وانشرها في جريدة الشعب وشوف كام واحد دانماركي حيقوم ويحرق سفارات مصر والسعودية.
    • ليه في تركيز على الاسلام واشمعنى احنا مش بناهجمهم في وسائل الاعلام زي ما هما بيعملوا؟ وليه مش بنعمل رسوم كاريكاتورية على بولس الرسول زي ما عملوا في الرسول بتاعنا؟ فيه حد منعك تعمل زيهم؟ ما انا قلتلك في النقطة إللي فاتت قوم سن القلم وارسم وابعت وانا إللي لسة قاعد بتكمل قراية. في تركيز على الاسلام ببساطة لأن لا المسيحين ولا اليهود ولا البوذيين فجروا مركز التجارة العالمي ولم يخطفوا الطائرات ومش بيعملوا عمليات انتحارية استشهادية علشان ال72 مزة إللي في الجنة. بس حترجع تاني وتقولي ان هما كمان بيقتلوا الأطفال والنساء في العراق وفلسطين ومرمطين بينا الأرض في كل حتة، وان دة مش عدل. حاقولك وهو يعني انت مكسور الجناح ولا ناقص إيد أو رجل، مش انت برضه عندك مقاومة باسلة في العراق وعمال بتطرقع بمب في فلسطين، وبتقولي ان العالم مش متاعطف مع قضيتك العادلة؟ عايز العالم يتعاطف معاك ازاي وانت نافخ عضلاتك على الفاضي. ما هو يا إما تنفخها على المليان أو تفسيها علشان تكسب تعاطف كل الدول وتحط أعدائك في موقف حرج زي الهنود ما عملوا ماع بريطانيا وزي نلسون مانديلا ما عمل مع حكومة بريتوريا العنصرية.
    • نيجي هنا للموضوع بتاع الست مرجانة وعلي بابا (وفاء وفيصل) روحوا دوروا على كلامها على يوتيوب انا مش ححطه هنا ولا ححط اللينك كمان علشان الجهلة كتير، إللي يتفرج على وفاء وهي بتتكلم يحس انها واصلة مع الكيانات الغربية ويتهأله ان فيه فعلاً حرب منظمة من دول ومنظمات غربية على الاسلام، وإللي يسمعها بتقول انها خطبت في البرلمان الدانماركي وأثنت على “الدانماركيين” بسبب اعادة نشر الرسوم يتهيأله ان البرلمان شجع اعادة النشر أو طالب به وان الموضوع واقف وراه السلطات الدانمركية مش مجرد حرية رأي والكلام الفاضي إللي ماليين بيه دماغنا على الفاضي. باختصار وفاء سلطان طلعت على الجزيرة حتى تساهم في تعزيز وتقوية الشعور المرضي العربي تجاه الغرب وكل ما هو غربي وبالذات ديمقراطية الغرب وحضارته حتى تصبح صورة الحكام العرب أقل دمامة وأقل قبحًا وتصبح سيرتهم عسلاً وسلامًا على وجدان الفرد العربي المستكين في هذه المزبلة التي اسمها العالم العربي. نقطة أخرى ساهمت فيها وفاء سلطان وهي وصم كل المغتربين العرب في الغرب بالعمالة والكفر حتى لا يصبح لهم أي سوق في العالم العربي وب1لك يتم تحييدهم تمامًا وان كانوا علماء وجهابذة مثل أحمد زويل الذي باع وطنه وارتمى في أحضان الأمريكان.

      وفي الآخر أقول ان التحقيق مع على بابا، عفوًا أقصد فيصل القاسم هو مجرد تهريج لأن استضافة الست مرجانة يصب مباشرة في أهداف قناة الجزيرة. ومن المتوقع ان يتم توبيخ القاسم وحثه على الاعتذار ويمكن أن يختفي مدة عن الانظار ثم يطل علينا مرة أخرى ليكمل مشوار التعمية والتغطية على العقل العربي. نظرية المؤامرة باختصار.

      4 تعليقات

      1. http://www.shbab1.com/2minutes.htm
        اليك هذا الموقع عسي ان ينتفع بة

        تحذير من المحرر: الوصلة عاليه سوف تنقلك إلى صفحة مليئة برسائل الاستغفار الفقاعية اللانهائية… استخدمها على مسؤوليتك الشخصية أو إذا كنت من عظيمي الذنوب وتريد استغلال بقية اليوم في الاستغفار. نرجوا منكم الدعاء للأخ عمر أو الدعاء عليه

      2. بالنسبة للست وفاء سلطان المشكلة اتنين لانها بتتكلم بالعربى لانها من جذور اسلامية ودرست الفقه ومع ذلك من الجاهلين واكثر الكارهين لدينها ودين اخوتها التسعة وتخون جميع القضايا بمنتهى السهولة اللى يغيظ زيادة ان اختها متجوزة فلسطينى مع ذلك فى حوارها الاخير بتشجع اسرائيل عشان تقتل اكتر فى الفلسطينين حاولت بكل الطرق افهم الفجوة دى جت من وين خصوصا انى عرفت ان دراسة الست وفاء هى الطب ومع ذلك هى محتاجة مساعدات لاعادة التاهيل لتصبح انسانة مرة اخى لانها اصبحت روبوت يوجه بالريموت كنترول

      3. هالإنسانة مو صاحية أكيد, مثل ما قلتي النصر قريب ..
        ربي ما يسمح لهالأشكال بالاستهزاء إلا لأنه بعده انتصار ..

      4. هذه الانسانة لاتعباْوا بها فمنها .. من يريد الشهرة ومن يريد الاموال و..و .. وبالتاْكيد ليس لها دين او اله .. لاْن الهها هواها … ولا تنزعجوا ..فالمرتدون كانوا ايضا ايام الرسول عليه الصلاة والسلام ..ودين الله باق ولكن هؤلاء الضالين ذاهبون ومؤاهم جهنم وبئس المصير –ولا تنزعجوا من ارتداد انسان او انسانة عن دين الحق – لاْن الشيطان هو قرينهم – وعلي سبيل المثال – هناك مسلمون اسما يتقلدون مناصب رفيعة ومصيرية ولا يعملون الا لصالح العدو – لماذا ……لاْن هؤلاء اتخذوا الههم هواهم …اي متمسكون بكراسيهم ويخشون الاعداء ولا يخشون الله …وهذا شئ واضح وبين هذه الايام ..

      أضف تعليقاً

      إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

      WordPress.com Logo

      أنت تعلق بإستخدام حساب WordPress.com. تسجيل خروج   / تغيير )

      صورة تويتر

      أنت تعلق بإستخدام حساب Twitter. تسجيل خروج   / تغيير )

      Facebook photo

      أنت تعلق بإستخدام حساب Facebook. تسجيل خروج   / تغيير )

      Google+ photo

      أنت تعلق بإستخدام حساب Google+. تسجيل خروج   / تغيير )

      Connecting to %s

      %d مدونون معجبون بهذه: